تاراز قالاسىنداعى №30 مەكتەپ-گيمنازياسىندا وتكەن كەزدەسۋگە وبلىس اكىمى اسقار مىرزاحمەتوۆ، ءبىلىم جانە عىلىم ءمينيسترىنىڭ ورىنباسارى شولپان كارينوۆا قاتىستى. باسقوسۋدا العاش بولىپ ءسوز العان ءبىلىم جانە عىلىم ءمينيسترىنىڭ ورىنباسارى شولپان كارينوۆا سالاداعى وزەكتى ماسەلەلەردى ورتاعا سالىپ، ولاردى شەشۋ باعىتىندا اتقارىلىپ جاتقان جۇمىستاردى تىلگە تيەك ەتتى.
«ءقازىر رەسپۋبليكاداعى بارلىق مەكتەپتەرى 10-سىنىپقا دەيىن جاڭارتىلعان ءبىلىم بەرۋ جۇيەسىن كوشتى. پەداگوگتەر بۇل جۇيە بويىنشا بىلىكتىلىگىن ارتتىرۋ كۋرستارىنان دا ءوتتى.وزدەرىڭىزگە ءمالىم، ءبىلىم سالاسىنداعى ەڭ وزەكتى ماسەلە «پەداگوگتەر مارتەبەسى تۋرالى» زاڭنىڭ قابىلدانۋى بولىپ وتىر.ءقازىر بۇل زاڭ جوباسى قازاقستان رەسپۋبليكاسىنىڭ پارلامەنتىنىڭ قاراۋىندا جاتىر.
سونداي-اق بيىل پەداگوگتەردىڭ بىلىكتىلىك ساناتىن انىقتاۋ تەستى ۇستازدار قاۋىمىنىڭ ۇسىنىسىنا ساي ەلەكتروندى فورماتتا وتە باستادى»، –دەدى شولپان قانات قىزى.
ۆيسە-مينيستر ءوز سوزىندە مەكتەپكە دەيىنگى ءبىلىم بەرۋ مەكەمەلەرىن باعالاۋدىڭ جاڭا جۇيەسى، دۋالدى ءبىلىم بەرۋدى جەتىلدىرۋدىڭ جاي-جاپسارى تۋرالى دا ايتىپ ءوتتى.
ءوز كەزەگىندە قازاقستان رەسپۋبليكاسى پرەمەر-مينيسترىنىڭ ورىنباسارى بەردىبەك ساپاربايەۆ ۇستازدارعا وتاندىق ءبىلىم بەرۋدەگى وزەكتى ماسەلەلەردى شەشۋگە ۇكىمەت تاراپىنان ءتيىستى جۇمىستاردىڭ قولعا الىنعانىن ايتىپ، بۇل ىستە بىرلەسە ارەكەت ەتۋگە شاقىردى. ال كەزدەسۋدى قورىتىندىلاعان وبلىسى اكىمى اسقار مىرزاحمەتوۆ وقۋشىلاردىڭ رۋحاني تانىم-تۇسىنىگىن دامىتۋدى ارنايى ءپاندى وقىتۋ ارقىلى جولعا قويۋ ۇسىنىسىن جەتكىزدى.
پىكىر قالدىرۋ